Shtetet e Bashkuara i kanë dërguar aeroplanët e “padukshëm” sulmues, të tipit F-22, në Korenë Jugore, për të marrë pjesë në ushtrimet ushtarake, në periudhën e tensioneve të larta në Gadishullin Korean.

Uashingtoni i ka dërguar aeroplanët F-22, që u shmangen radarëve, nga një bazë në Japoni, në mbështetje të ushtrimeve ushtarake Shtetet e Bashkuara – Koreja Jugore.

Më herët gjatë javës së kaluar, Shtetet e Bashkuara i dërguan dy bombardues të “padukshëm” B-2, për të marrë pjesë në këto ushtrime, që Koreja Veriore i ka dënuar duke i cilësuar si provokim.

Presidentja e Koresë Jugore, Park Geun-hye, është takuar me ministrin e mbrojtjes, Kim Kwan-jin, dhe me zyrtarë të tjerë ushtarakë.

Pas takimit presidentja jugkoreane tha se kërcënimet e Koresë Veriore i merr “shumë seriozisht”.

“Nëse ka ndonjë provokim kundër Koresë Jugore dhe popullit të saj, atëherë duhet të ketë përgjigjje të fuqishme me luftime fillestare, pa asnjë konsideratë politike”, tha presidentja Park.

Njëherësh, lideri i Koresë Veriore, Kim Jong Un, ka shpallur “një linjë të re strategjike” për vendin e tij. Ai e kryesoi seancën plenare të Komiteti Qendror të Partisë së Punës në pushtet. Kjo ishte mbledhja e parë e tillë prej vitit 1993.

Lideri Kin Jong Un tha se armatimi atomik i Koresë Veriore është realitet dhe ka shprehur përkushtim për zgjerimin e tij, ndërsa paralelisht do të zhvillohet ekonomia, përkundër sanksioneve ndërkombëtare.

Tensionet në gadishullin Korean kanë filluar prej muajit shkurt, kur Pheniani e ka zhvilluar testin e tretë të armatimit bërthamor. Ky test është dënuar nga komuniteti ndërkombëtar, ndërsa Kombet e Bashkuara dhe Shtetet e Bashkuara kanë imponuar sanksione shtesë.

Më 30 Mars, Koreja Veriore shpalli se ndërmjet dy Koreve ekziston “gjendje lufte” dhe se forcat ushtarake të Koresë Veriore i kanë marrë në shënjestër bazat në Korenë Jugore dhe në rajon.

Javën e kaluar, mediat verikoreane, të udhëhequra nga shteti, kanë shpallur se njësitet e raketave me rreze të gjatë veprimi, po i merrnin në shënjestër bazat e Shteteve të Bashkuara në Guam, Havai dhe në tokën e SHBA-ve.

Punëtorët e Koresë Jugore, që e kalojnë kufirin ndërmjet dy vendeve, për të shkuar në punë në Parkun Industrial Kaesong në Korenë Veriore, që administrohet nga të dy vendet, i thanë agjencisë Reuters se ata janë të shqetësuar për situatën.

Kim Duk-su, 52 vjeçar, tha se shpreson se Veriu do t’i kuptojë avantazhet që parku industrial të jetë i hapur.

“Jam pak i shqetësuar. Përse jo? Jam pak nervoz. Por çka mund të bëjë unë? Më duhet të shkoj atje në punë. Unë nuk e di se çka mendojnë verikoreanët për këtë situatë, por si mund ta mbyllin ata kaq lehtë këtë hapësirë? Ata duhet të prodhojnë para; parku industrial është burim i fitimit të dollarëve”, tha Kim Duk-su.(f.bujupi)/rel