Ferid Agani, kryetar i Partisë së Drejtësisë dhe njëherësh ministër i Shëndetësisë, para elektoratit në Drenas, ka pohuar se parim i partisë që ai udhëheq është interesi i qytetarëve dhe i shtetit njëkohësisht, synim ky sipas tij, është i paarritshëm për klasën politike të Kosovës. Agani duke shpalosur platformën dhe vizionin e subjektit që ai drejton, ka pohuar se që nga themelimi i i këtij subjekti, parim ka qenë drejtësia, parim ky që edhe këtë ditë qëndron fuqishëm në themelet e saj.

Ai ka kritikuar klasën politike aktuale, duke thënë se po thirren në drejtësi, e të tillët po diskriminojnë qytetarët, duke shkelur liritë dhe të drejtat e tyre.

“Klasa politike e Kosovës është kah bien në këtë detyrë. Kjo klasë politike po mundohet t’i mbërrijë interesat shtetërore, po mundohet t’i plotësojë interesat e qytetarëve, por nuk po arrin të sigurojë një rrjetë harmonike të këtyre proceseve. Nuk po arrin t’i pajtojë këto procese, në mënyrë që qytetari të jetë i kënaqur, por edhe interesi i shtetit të jetë i plotësuar. Dhe a dini pse nuk është kah arrihet kjo. Për një arsye se pushtetarët dhe klasa nuk janë të përkushtuar që në themelet e politikave shtetërore të vendos sinqerisht liritë dhe të drejtat e njeriut”, ka pohuar ai.

I pari i PD-së, u ka bërë thirrje qytetarëve të Drenasit, se nëse dëshirojnë drejtësi, dhe barazi për të gjithë, pa dallim, më tre nëntor të ndëshkojnë ata që deri më sot i diskriminuan, dhe të votojnë për drejtësi, pra numrin 70.

Vehbi Berisha, bartës i listës së Partisë së Drejtësisë, në Drenas, ka kërkuar  nga të pranishmit që ta konfirmojnë dhe ta rrisin përkrahjen për kandidatët për asamblenë komunale të këtij qyteti, pasi që pretendon se në mandatin e kaluar, PD-ja ka përfaqësuar dinjitetshëm interesat e qytetarëve, duke thënë se nuk bëjnë pazare mbi parimet e tyre.

“Ne do të angazhohemi për një Drenas ndryshe, funksional, mirë të menaxhuar dhe të barabartë për të gjithë qytetarët e vet. Me PD-në nuk do të ketë diskriminim në arsim dhe punësim. Nuk do të ketë korrupsion dhe dukuri negative, por do të ketë rend, etik dhe moral. Do t’ia kthejmë dinjitetin këtij vendi”, ka pohuar ai.

Programi i PD-së, sipas, Berishës, përfshin edhe depolitizimin institucional, zhvillimin e bujqësisë, thithjen e donacioneve nga mërgata, kushte më të mira për biznes, si dhe transparencë dhe llogaridhënie. Ndërsa sipas tij rinia do të zë një hapësirë të veçantë në programin e PD-së.

Po ashtu, kryetari i PD-së Ferid Agani me bashkëpunëtorë, në kuadër të fushatës parazgjedhore, ka mbajtur një takim me të rinjtë e qytetit të Shtimes, ku i njoftoi ata me programin e PD-së, për avancimin dhe përkrahjen e rinisë në këtë qytet. Agani premtoi të rinjtë se nëse arrijnë të përfaqësohen në masë të lakmueshme në kuvendin komunal të Shtimes, do të jenë zëri i tyre i fuqishëm.