Beogradi dhe Prishtina ende nuk kanë rënë në ujdi për telekomunikacionin, përkatësisht kodin telefonik ndërkombëtar të Kosovës, i thanë sonte burime nga qeveria serbe agjencisë së lajmeve Beta.

 Arritjen e ujdisë e ka demantuar edhe zëvendësministri i Jashtëm, Petrit Selimi, i cili në llogarinë e tij në Twitter ka shkruar se ende nuk ka ujdi dhe se ende pritet përgjigja e Beogradit “ndaj propozimit të BE-së”.

 Ministri serb, Rasim Lajiq ka deklaruar më herët se afati për marrëveshje mbi telekomunikacionin skadon më 8 gusht dhe se, në qoftë se kjo çështje nuk harmonizohet ndërmjet dy palëve, atëherë nuk do të zhvillohet as takimi i radhës ndërmjet kryeministrave Daçiq e Thaçi më 27 gusht në Bruksel.