Pyetje: Selam alejkum pa dyshim se jeni shum te mir ju admiroj per kohen qe na falni neve duke u munduar qe te na pergjegjni sa me mir qe ne te kemi me let per qdo gje qe na perokopon lidhur me jeten tonë ne at menyr qe te mos bejm mekate dhe te ecim rruges se drejt desha te bej nje pyetje me kan pyetur disa shoqe te mijat edhe un nuk kam ditur si te pergjigjem njekosisht edhe jom habitur? me kan then se po ekziston nje lloj loje qe behet pas ores 12 te nates duke e thirrur shpirtin e dikujt qe ka vdekur edhe ai te tregon se kon e ke fat te jetes me than se e kan provuar shum edhe ju kadal e vertet e un desha te dij a osht mekat nese e thrrasim dikond te vdekur dhe e lusim qe te na tregoj fatin e jetes pa marr para sysh a osht e vertet a po jo me shpres se se shpejti do me pergjigjeni ju falenderoj shum gjith te mirat Allahu ju shperbleft

Përgjigje:  Me emrin e Allahut, të Gjithëmëshirshmit, Mëshirëplotit

Falënderimi i takon Allahut. Paqja dhe bekimi i Allahut qofshin mbi të Dërguarin e fundit të Allahut, mbi familjen e tij, shokët e tij dhe të gjithë ata që ndjekin rrugën e tij deri në Ditën e Gjykimit.

Motër e nderuar, Allahu më bëftë mua, ty dhe të gjithë muslimanët që të kuptojnë fenë e Allahut në atë mënyrë që këmbët tona të jenë të palëkundura në adhurimin dhe njësimin e Tij të vetëm e pa shok.

Duhet të dimë se çdo besimtar i vërtetë dhe i vendosur beson fuqishëm se Allahu është i vetmi që posedon dijen e të fshehtës dhe se cilido tjetër që e pretendon këtë nuk është gjë tjetër veçse një gënjeshtar i dështuar dhe një thirrës i njerëzve për në dyert e Xhehenemit. Allahu shpesh herë e ka sqaruar hollësisht këtë fakt në librin e tij madhështor:

“Thuaj: ‘Askush, përveç Allahut, në qiell apo në Tokë, nuk i di të fshehtat dhe as nuk do ta dijë se kur do të ringjallet’”. En-Nemël, 65.

“Ai i ka çelësat e së padukshmes (së fshehtës) dhe vetëm Ai i njeh ato. Ai e di ç’ka në tokë dhe në det. Asnjë gjeth nuk bie, pa e ditur Ai dhe nuk ekziston asnjë kokërr në errësirën e tokës, as e njomë, as e thatë, që të mos jetë shënuar në Librin e qartë (Leuhi Mahfudh). El-En’am, 59.

Shiko se si i drejtohet Allahu profetit të Tij Muhamedit: “Thuaj: ‘Unë nuk mund t’i sjell vetes as dobi, as dëm, përveçse aq sa dëshiron Allahu. Sikur ta dija të padukshmen (të fshehtën), do t’i shumoja të mirat dhe nuk do të më prekte asnjë e keqe. Unë jam vetëm paralajmërues dhe sjellës i lajmeve të mira për njerëzit që besojnë’”. El-Araf, 188.

Motër e nderuar, të ardhmen nuk mund ta përcaktoj askush, as shpirtrat e të vdekurve, as melaiket as falltarët, askush tjetër veç Allahut i Cili të ka shkruar detajet e jetës tënde në librin e ruajtur (Leuhi mahfudh), përpara se të krijonte qiejt dhe tokën dhe kur të krijon në barkun e nënës Ai dërgon melekun me këto katër gjëra: djalë apo vajzë, sa do të jetojë, i pasur do të jetë apo i varfër dhe do të jetë fatlum apo i mjerë.

Kështu që këto që pretendojnë se shpirtrat e të vdekurve u tregojnë fatin me anë të lojërave të cilat bëhen pas orës 12 të natës, nuk janë veçse trillime e hile të shejtanit. Sepse shejtanët përpiqen gjithmonë që t’i çojnë punët e njerëzve dëm dhe t’i humbin nga e vërteta, kështu që nëse është e vërtetë një gjë e tillë (se gjoja shpirtrat u kthejnë përgjigje) atëherë dije se ata nuk janë veçse thjeshtë xhind që lozin me njerëzit dhe i humbin ata. Ndaj muslimani i cili e njeh mirë fenë e tij nuk bie në grackat e mashtruesve të cilët i përdorin këto shpeshherë dhe për të ngrënë pasurinë e të paditurve.

Ndaj unë të bëj thirrje ty dhe të gjithë muslimanëve që ta ruajnë njësimin e Allahut të pacenuar dhe të mos e pluhurosin me besime të kota dhe të jeni të bindur se  dijen e të fshehtës Allahu e ka rezervuar për vete, ndaj mos i shoqëroni Allahut askënd në këtë cilësi. Pra një gjë e tillë nuk lejohet, sepse kjo është njësoj si të shkosh tek magjistari apo falltari.

E lusim Allahun të na bëjë të kuptojmë fenë e Tij dhe ta adhurojmë Atë të vetëm e pa shok! Amin!

Allahu e di më së miri.

Bledar Haxhiu