Skandali i agjencisë së taksimit është një prej çështjeve kundërthënëse me të cilën po ndeshet Shtëpia e Bardhë.

Administrata mbetet në pozita mbrojtëse lidhur me sulmin terrorist në Bengazi të Libisë që u kushtoi jetën katër amerikanëve vitin e kaluar.

Departamenti i Drejtësisë është gjithashtu nën presion për të justifikuar marrjen fshehtazi të tabulateve telefonike të agjencisë Associated Press në lidhje me një hetim që rrodhi në shtyp.

Por është çështja e agjencisë së taksimit që ka vënë në shënjestër amerikanët për shkak të bindjeve të tyre politike që ka ngjallur reagimin më të fortë në gjithë spektrin politik, thotë analisti John Fortier.

“Për mendimin tim kjo është çështja që e shqetëson më shumë amerikanët, sepse kjo nuk është një organizatë shumë popullore, por është një organizatë që njerëzit e dinë se ka mjaft informacion që ndikon ndjeshëm tek ta, prandaj nuk duan që kjo të ndodhë”.

Skandalet janë shqetësuese për presidentin, thotë zoti Fortier, por nuk është e thënë që ta dëmtojnë atë.

“Axhenda e tij e tanishme kërkon marrëveshjen e të dy partive dhe mendoj se skandali mund të jetë në përgjithësi negativ, por nuk do ta dëmtonte atë nëse të dy partitë shikojnë dobi që të bashkëpunojnë për disa nga këto çështje”.

Zoti Obama mund të jetë gati t’u bashkohet parardhësve të tij, të cilët ndeshën në vështirësi gjatë mandatit të tyre të dytë, thotë ishin shefi i personelit të Shtëpisë së Bardhë, Ken Duberstein.

“Çdo presidencë ka probleme gjatë vitit të pestë apo të gjashtë. Dhe në qoftë se nuk ke marrëdhënie të besueshme në Dhomën e Përfaqësuesve  dhe në Senat, apo me popullin amerikan, atëhere nuk ke se ku të mbështetesh”.

Richard Nixon-i dha dorëheqjen nga presidenca për shkak të skandalit të Watergate-it. Ronald Reagan-i u gjend të pozitë të vështirë për skandalin  Iran Contra në mandatin e tij të dytë dhe Bill Clinton-i, u ndëshkua për marrëdhëniet me Monica Lewinsky-in por qendroi në post.zeriamerikes/