Në internet është publikuar xhirimi nga momenti i aksidentit të trenit në Spanjë. Pamjet tragjike janë kapur nga kamerat e survejimit.

Të përkujtojmë se në veriperëndim të Spanjës, në afërsi të qytetit të Santiago de Compostela në Galici, dje, pak para 09:00 në mbrëmje, një tren ka dalë nga binarët, për çka është rrotulluar dhe madje është kapluar nga flakët.

Në aksident u vranë të paktën 78 njerëz, ndërsa 143 të tjerë u plagosën. Në trenin e shpejtësisë së lartë, në momentin e aksidentit ishin 218 pasagjerë dhe katër punonjës që udhëtonin në linjën Madrid-Ferrol.

Shkaku i aksidentit është ende i paqartë. Në disa njoftime thuhet se treni mund të ketë shtuar shpejtësinë në një kthesë. Kompania spanjolle e hekurudhave Renfe e quajti këtë deklaratë “shumë të rrezikshme”.

Pamjet e vendit të aksidentit tregonin vagonë të përmbysur dhe të ngatërruar me njëri-tjetrin, prej të cilëve të paktën njëri është shkatërruar tërësisht, ndërsa nga çatia e lokomotivës shpërthyen flakët.

Kryeministri spanjoll, Mariano Rajoy, ka shpallur tri ditë zie për viktimat që humbën jetën.

Ai e ka vizituar vendin e ngjarjes në Santiago de Compostela, prej nga ka origjinën. Rajoy ka vizituar edhe të lënduarit në spital. /Telegrafi/