[Kundërpërgjigjje ndaj kolumnit të Halil Matoshit: http://www.koha.net

Sot është lehtë të bëhesh kolumnist. Shkruaj çfarë të duash, hapësira elektronike, që për fat të keq në shumicën e rasteve kontrollohet nga “redaktor” jo profesional, ia mundësojnë nipave të Millosheviqit që të shkruajnë se çfarë duhet të veprojë një qytetar i lirë i Kosovës. Kur në zemrën e njeriut mbisundon egoizmi dhe personaliteti i egërsirës, atëherë nuk ke edhe çfarë të presësh, pos ofendime, dirigjime dhe “analiza” që në qytetin tonë, u thuhet “me ja fut kot”.

Sot nuk kemi vetëm kolumnista, por edhe hoxhallarë. Veni re, sot kolumnistat kanë marrë përgjegjësinë e hoxhës dhe imamit. Ata marrin guxim që të na tregojnë, shpjegojnë dhe definojnë se çfarë qenka lufta, si duhet bërë lufta dhe çfarë nënkupton kjo. Sot ata na tregojnë se çfarë është mbulesa, çfarë xhamia, çfarë dispozite ka kjo çështje apo ajo çështje, shkurt e shqip: Duhet të mbyllet institucioni i BIK-ut, sepse sot ekzistojnë kolumnistët, që na japin “fetva” ashtu siç dëshirojnë ata dhe nuk guxon askush që t’i kundërshtojë, sepse kundërshtarët shpallen si radikalist, terrorist dhe ekstremist. Është për të ardhur keq!

Situatën edhe më shumë e tmerron përkrahja e “redaktorëve” të kësaj ideologjie komuniste, që në emër të “laicizmit” po çmend çdo njeri normal, habitet çdo qytetar që sadopak, ka njohuri rreth kuptimit dhe zbatimit të laicizmit.

Në luftën e Kosovës kishte shumë shqiptarë dhe boshnjak që janë solidarizuar me Kosovën, normal, ashtu siç bënë shumë kosovarë në krizën e Bosnjës, ku u solidarizuan me boshnjakët dhe luftuan kundër një armiku të përbashkët, i quajtur Serbi. Shqiptarë nga Shqipëria, Maqedonia, Lugina dhe Mali i Zi, nuk hezituan aspak që ta përkrahin një shqiptar nga Kosova që klithma e tij dëgjohej në çdo anë. Lufta në Kosovë në mediet ballkanike, e posaçërisht ato sllave, ishte e quajtur si terroriste, fundamentaliste dhe radikaliste. Situatë e njëjtë ishte edhe në Maqedoni, ku çdo luftëtarë është quajtur ashtu siç i ka konvenuar politikës redaktoriale të nji televizioni. Duhet pasur parasysh se shqiptarët nuk janë solidarizuar vetëm mes vete, por janë solidarizuar edhe me qytetarët e Spanjës,  kur në vitin 1936 iu bashkëngjitën Brigadave Internacionale, në luftën qytetare të Spanjës. Askush deri më tani nuk ka marrë guximin që të thotë se atyre duhet t’u mirret nënshtetësia, e kur kësaj i shtohet edhe regjimi komunist që sundonte shumë vende të botës, parashtrohet pyetja: A është më i keq Josip Broz Tito apo Halil Matoshi?

Përsëri e them, është për të ardhur keq se si disa gazeta dhe media elektronike, ia mundësojnë komunistëve të veshur me petkun e laicizmit, që të bëhen interesant duke i fyer të gjithë ata që solidarizohen dhe kanë të drejtë individuale që ta përkrahin një luftë përderisa ajo nuk është në kundërshtim me aleancën që Kosova ka me ndonjë shtet apo organizatë.

Duhet cekur se shqiptarët nuk janë të vetmit që e kanë përkrahur luftën kundër presidentit të Sirisë, Bashar al-Assad, sipas BBC-së, vetëm nga Evropa Perëndimore, drejt Sirisë kanë udhëtuar mbi 500 vullnetarë. Deri më tani, asnjëri prej kolumnistëve të Bashkimit Evropian, e vlen të ceket se qytetarët që më së shumti e kanë dëshmuar laicizmin janë ata të Evropës Perëndimore, asnjëri pra, nuk ka dalë me këtë ideologji të rrezikshme që qytetarëve të tyre t’ua merr nënshtetësinë, por ja që nipat e Millosheviqit i kemi në mes të Kosovës, që bëhen më katolik se papa.

Mirëpo Halil Matoshi leje që është vetëm një kolumnist, por bëhet edhe komentues i kushtetutës, edhe atë vetëm atëherë kur i konvenon. Interesant është se edhe serbët, që përkrahin ushtrinë e Bashar al-Assadit, nuk kanë marrë guximin që të flasin për humbjen e nënshtetësisë së atyre që luftojnë krah për krah me të, kur dihet mirë se ushtria e Assadit ka thyer të gjitha ligjet ndërkombëtare duke i shpallur luftë publike faktorit ndërkombëtarë, por ja, Halili nuk e din këtë.

Pastaj, si mund t’i besohet gazetave që përkrahin Halilin, kur mu ato gazeta para disa muajve dolën me shkrime se shqiptarët në Siri luftojnë për të holla dhe se paguhen shumë mirë, tash mu ato, dalin dhe thonë se shqiptarët po luftojnë “për Allah”, ku mbeti ndërgjegjja e Halilit dhe të tjerëve si ai, kur dihet mirë se nëse një person apo një grup bije në kundërshtim me fjalët e veta, bëhet i pabesueshëm?

Egoizmi është cilësi e qenit, çdo shqiptarë do të mërzitej nëse këto tema hapen në kohën kur civilët vriten dhe vlerësohen ashtu siç vlerësohet delja në thertore. Si do të ishte situata që gjatë masakrës së Reçakut të Kosovës, në shtete tjera “kolumnistët” të shkruanin se a duhet të përkrahet lufta e Kosovës, a duhet të solidarizohemi me ta apo jo?! Mbaje dorën në zemër dhe mendo.

Do të ishte prej burrërisë dhe humanizmit se para se të flitej për nënshtetësinë e tyre, të flitet për shëndetin, situatën, kushtet dhe gjendjen e tyre. Fundja, të gjitha analizat dhe statistikat e deritanishme, janë të bazuara me ideologjinë e quajtur “ma merr mendja”, çfarë thua që nëse ata kthehen dhe e dëshmojnë të kundërtën, ku mbet ndërgjegjja dhe përgjegjësia e egoistit, analistit dhe “kolumnistit”?

E kam vënë re se çdoherë kur ndonjë kolumnist dhe gazetë bije nga syri i lexuesve, dalin me tema të këtij lloji, qesharak dhe joprofesional, për tu bërë gazi i botës.